RaraNews

रारान्यूज संवाददाता प्रकाशित : २०७७/१/२६ गते
१२१ पटक

राँझा, वैशाख २६ गते । कोरोना भाइरस सङ्क्रमण न्यूनीकरणका लागि बाँकेमा परीक्षण दायरा विस्तार गरिएको छ । कोरोना सङ्क्रमित क्षेत्र नेपालगञ्ज उपमहानगरपालिकाको वडा नं ८ सँगै अन्य शङ्कास्पद क्षेत्रमा समेत परीक्षणलाई विस्तार गरी तीव्रता दिइएको जिल्ला स्वास्थ्य कार्यालय बाँकेका अधिकृत एवम् कोरोना फोकल पर्सन नरेश श्रेष्ठले जानकारी दिनुभयो ।
उहाँका अनुसार बिहीबारदेखि नेपालगञ्जको कोरोना सङ्क्रमित क्षेत्रसँगै अन्य शङ्कास्पद क्षेत्रमा समेत कोरोना परीक्षणका लागि स्वाब सङ्कलन गर्न थालिएको हो । उक्त क्रममा बिहीबर बाँकेका थप ४८ जनाको स्वाब सङकलन गरिएको छ । कोरोना सङ्क्रमितको सम्पर्कमा आएकाहरुको ट्रेसिङ गर्दै स्वाब लिने क्रममा बिहीबार तीन स्थानबाट ४८ जनाको स्वाब सङ्कलन गरिएको हो ।
नेपालगञ्जको बिपी चोक आसपासबाट ३०, खजुरा गाउँपालिका वडा नं ७ सोनपुरबाट १७ र क्यान्सर अस्पताल खजुराबाट एक जनाको स्वाब सङ्कलन गरिएको कोरोना फोकल पर्सन श्रेष्ठले बताउनुभयो ।
यसअघि पहिलो सङ्क्रमित व्यक्तिको कन्ट्रयाक्ट ट्रेसिङ गरेर नेपालगञ्ज उपमहानगरपालिका वडा नं ८ का विभिन्न स्थानबाट ९४ जनाको स्वाब लिइएकामा एउटै टोलका २२ जनामा सङ्क्रमण पुष्टि भएको थियो । त्यसपछि ती २२ जनाको सम्पर्कमा आएकाहरुको खोजी गर्दै स्वाब लिन थालिएको हो ।
हालसम्म कोरोना सङ्क्रमित क्षेत्र वडा नं ८ मा मात्रै पहिलो पटक ९४, दोस्रो पटक ५४ र तेस्रो पटक १३६ गरी २८४ जनाको स्वाब सङ्कलन गरिएको छ । पहिलो पटक सङ्कलन गरिएको ९४ मा २२ जना सङ्क्रमित भेटिए पनि दोस्रो पटक सङ्कलन गरिएको ५४ मा सबैजनाको रिपोर्ट नेगेटिभ आएको छ । तेस्रो चरणमा सङ्कलन गरिएको १३६ स्वाबमध्ये बिहीबार आएको ३४ जनाको रिपोर्ट नेगेटिभ रहेको फोकल पर्सन श्रेष्ठले जानकारी दिनुभयो । एक सय दुई जनाको स्वाब नेपालगञ्जस्थित भेरी अस्पतालको पिसिआर प्रयोगशालामा परीक्षणका क्रममा छ ।
कोरोना परीक्षणमा शङ्का नगर्न आग्रह
नेपालगञ्जका मुस्लिम समुदायका अगुवा र चिकित्सकले कोरोना परीक्षणमा कुनै शङ्का नगर्न आग्रह गर्नुभएको छ । कोरोना भाइरसको कुनै लक्षणनै नदेखिएका व्यक्तिको परीक्षण रिपोर्ट पोजेटिभ आएपछि आशङ्कित तथा त्रसित हुनुभन्दा थप सजगता अपनाएर छिटोभन्दा छिटो परीक्षण गरिनुपर्ने उहाँहरुको भनाइ छ ।
नेपालगञ्जका मुस्लिम समुदायका धर्मगुरु मौलाना अब्दुल जब्बार मञ्जरीले रोगले कुनै पनि धर्म वा सम्प्रदाय नहेर्ने भएकाले जोसुकैलाई पनि सङ्क्रमण हुनसक्ने बताउँदै सतर्कता अपनाउन अनुरोध गर्नुभयो । नेपालगञ्ज ८ जोलाहनपुर्वा टोलमा मात्रै २२ जनालाई सङ्क्रमण देखिएकाले वडाका सबै व्यक्ति कोरोना परीक्षणमा सहभागी भई आफू र अरुलाई पनि सुरक्षित राख्न सजगता अपनाउनुपर्ने उहाँको भनाइ छ ।
उपमहानगरपालिकाका पूर्वउपप्रमुख एवम् वडा नं ८ का अगुवा शमसुद्दीन सिद्धिकी कुनै लक्षण नै नदेखिएको भन्दै कतिपय स्थानीयवासीले कोरोना जाँच गर्न नमानेको बताउनुहुन्छ । उनीहरुलाई परीक्षणमा कुनै शङ्का नगरी परीक्षण गर्नका लागि टोल तथा समुदायमा समन्वयको काम गर्दै आएको उहाँले बताउनुभयो ।
कोरोनाको लक्षण नभए पनि परीक्षण रिपोर्ट पोजेटिभ आएपछि अहिले खजुरास्थित कोरोना आइसोलेशन अस्पतालमा राखिएका व्यक्तिले आफूलाई पुनः परीक्षणको माग गरेको उहाँको भनाइ छ । रमजान चलिरहेकाले रोजा बसेका व्यक्तिलाई सम्झाइबुझाई कोरोना परीक्षणमा सहभागी गराइएको सिद्धिकीले जानकारी दिनुभयो ।
नेपालगञ्ज मेडिकल कलेज शिक्षण अस्पतालका वरिष्ठ चिकित्सक डा आशिम किदवाईले कोरोनाको हरेक बिरामीलाई लक्षण देखिनु जरूरी नभएकाले परीक्षणमा सबै सहभागी हुन सर्वसाधारणलाई अनुरोध गर्नुभयो । “कुनै कुनै देशमा ८० देखि ९४ प्रतिशत कोरोना सङ्क्रमितमा लक्षण नदेखिएको रिपोर्ट पनि छ । लक्षण नहुनु राम्रो कुरा हो, यसको अर्थ भाइरस धेरै कडा किसिमको छैन । त्यसैले लक्षण नै नदेखी कोरोना देखिएको कुरालाई नकारात्मक तरिकाले सोच्नु भएन”, उहाँले भन्नुभयो, “कोरोना मात्र होइन एचआइभी, हेपाटाइटिस बी, सी जस्तो रोगमा पनि सङ्क्रमण भइसके पनि वर्षौँसम्म लक्षण नहुन पनि सक्छ, यो कुरा हामीले बुझ्न जरुरी छ ।”
उहाँले अहिले रमजानमा रोजा (व्रत) ले गर्दा परीक्षणमा कुनै पनि फरक नपर्ने भएकाले ढुक्क भएर जाँच गराउन सल्लाह दिनुभयो । एकै पटक धेरै जनाको परीक्षण पोजेटिभ देखिएपछि भेरी अस्पतालको पिसिआर यन्त्रप्रति जाँचको गुणस्तरमा शङ्का गर्नु स्वाभाविक भए पनि यो अन्तर्राष्ट्रिय मापदण्डानुसार गुणस्तरीय परीक्षण भएकाले विश्वास गर्नाको विकल्प नभएको उहाँको भनाइ छ ।
भेरी अस्पताल नेपालगञ्जका प्रमुख डा प्रकाश थापाले आरटिपिसिआर परीक्षणको नतिजामा कुनै सन्देह नगर्न सर्वसाधारणलाई अनुरोध गर्नुभएको छ । “भेरी अस्पतालमा कोरोना परीक्षणको निम्ति थ्रोट स्वाब लिएर गरिने आरटिपिसिआर जाँच विश्वस्तरीय मेसिन क्वाइजन रोटर–जिन क्यूमा नेपाल सरकारले प्रदान गर्ने एक्स्ट्रक्सन किट र रिएजेन्ट्स प्रयोग गरेर निश्चित प्रक्रिया र मापदण्ड अनुसारगरिन्छ”,उहाँले भन्नुभयो, “विश्वसनीयता यकिन गरेरै स्वास्थ्य तथा जनसङ्ख्या मन्त्रालयले सो प्रयोगशालालाई भेरिफिकेसन सेन्टरको मान्यता दिएको हो । त्यसैले पिसिआर टेस्टको नतिजामा कुनै सन्देह नराख्नुहुन हामी सबैलाई अनुरोध गर्छौंँ ।”
उहाँले परीक्षणमा क्वालिटी एस्युरेन्सका निम्ति केही नमूनालाई रेफरेन्स ल्याबमा पठाउने कार्य प्रोटोकलमा नै हुने गरेकालेले त्यसबारे अस्पताल सचेत रहेको जानकारी दिनुभयो ।

बाँके आजदेखि ४ घण्टा खुला
बाँके प्रशासनले नेपालगञ्जमा तीन दिनदेखि जारी गरेको निषेधाज्ञा आजदेखि हटाएको छ । निषेधाज्ञा हटाएसँगै नेपालगञ्जमा व्यापारव्यवसाय खुकुलो बनाइने भएको जिल्ला प्रशासन कार्यालय बाँकेले जनाएका छ । प्रशासनले यही वैशाख २३ गतेदेखि २५ गते राति ११ बजेसम्मका लागि तीन दिन निषेधाज्ञा जारी गरेको थियो ।
प्रशासनले आजदेखि अत्यावश्यक काममा बाहेक कोही पनि व्यक्ति घर बाहिर ननिस्कने तथा सवारी, अनुमति प्राप्त र अत्यावश्यक वस्तु तथा सेवामा प्रयोग हुनेबाहेकका कुनै पनि सवारी साधन सञ्चालन नगर्ने निर्णय गरेको सहायक प्रमुख जिल्ला अधिकारी दीर्घराज उपाध्यायले विज्ञप्तिमा जनाउनुभएको छ । जिल्ला प्रशासन कार्यालय बाँकेले यस अघि बन्द गरिएका कोरोना संक्रमित क्षेत्रमा निषेधित क्षेत्रको आदेश भने कायमै रहने जनाएको छ । नेपालगञ्जका रानीतलाउ, त्रिभुवनचोक र बिपी चोकमा रहेको सब्जीमण्डी अर्को निर्णय नभएसम्मका लागि बन्द रहने जनाइएको छ ।  rss

प्रतिकृया दिनुहोस्