रोयल च्यालेन्जर्स बैंगलोरलाई ६ विकेटले हराउँदै सनराइजर्स हैदरावाद यूएईमा जारी १३ औँ सिजनको आईपीएलको दोस्रो क्वालिफायरमा प्रवेश गरेको छ ।
शुक्रबार भएको एलिमिनेटर खेलमा बैंगलोरले दिएको १ सय ३२ रनको लक्ष्य हैदराबादले १९.४ ओभरमा चार विकेट गुमाएर भेट्टायो ।
उसका लागि केन विलियम्सनले अविजित ५०, मनीष पाण्डे, जेसन होल्डरले २४/२४ र कप्तान डेविड वार्नरले १७ रन बनाए । बलिङमा आरसीबीका मोहम्मद सिराजले सर्वाधिक २ विकेट लिए ।
त्यसअघि टस हारेर ब्याटिङको मौका पाएको आरसीबीले निर्धारित २० ओभरमा ७ विकेट गुमाएर १ सय ३१ रन बनायो ।
उसका लागि एबी डिभिलियर्सले ५६, आरोन फिन्चले ३२ र मोहम्मद सिराजले अविजित १० रन बनाए । बाँकी ब्याट्सम्यानले भने दोहोरो अंकमा समेत रन बनाउन सकेनन् ।
बलिङमा जेसन होल्डरले ३, थांगारासु नटराजनले २ र साहबाज नदीमले एक विकेट लिए ।
बैगलोरसँगको जितसँगै हैदरावादले अब फाइनल पुग्न दिल्ली क्यापिटल्ससँग खेल्नेछ । पहिलो वालिफायरमा मुम्बईविरुद्ध दिल्ली ५७ रनले पराजित भएको थियो । दिल्ली र हैदराबादबीचको खेल भोलि हुनेछ ।