जाजरकोट : रुकुमपश्चिमको चौरजहारी नगरपालिकाले पहिलो पटक किसानलाई पेन्सन दिन लागेको छ। पेन्सन दिन निवेदन संकलन गरिरहेको छ। उक्त निवेदनबाट छनोटमा परेका किसानलाई मासिक एक हजार रुपैयाँका दरले पेन्सन दिइने छ।
आर्थिक वर्ष २०७७/७८ को निर्णयलाई चालु आर्थिक वर्षबाट कार्यान्वयनमा ल्याउन लागिएको हो। पेन्सन दिनका लागि कार्यविधि निर्माण भइसकेको कृषि शाखाका प्रमुख विमल खड्काले बताए।
‘किसान पेन्सनका लागि चालु आर्थिक वर्षको पहिलो चरणमा पाँच लाख रुपैयाँ विनियोजन गरिएको छ,’ खड्काले भने‚ ‘विभिन्न खेती, कृषिबाली र पशुपालनमा लागेका किसानलाई पेन्सन दिने योजना बनाएका छौं।’
त्यसका लागि व्यक्तिगत वा भाडाको जग्गामा कम्तीमा तीन रोपनी व्यावसायिक तरकारीखेती, पुष्पखेती वा नर्सरी स्थापना गरेको हुनुपर्नेछ। खाद्यान्न तथा तरकारीको बीउ उत्पादन गर्ने किसानले पाँच रोपनी जग्गामा खेती गरेको हुनुपर्ने मापदण्ड तोकिएको छ।
यस्तै‚ पाँच रोपनीमै आँप, लिची, केरालगायत फलफूलखेती गरिरहेका किसान पनि पेन्सनका लागि योग्य मानिने कार्यविधिमा उल्लेख छ। २५ माउ भेडा वा बाख्रा पालेका, कम्तीमा तीन दुध दिने भैँसी वा उन्नत जातका गाई पालेका किसानले पनि पेन्सनका लागि निवेदन दिनसक्ने नगरपालिकाले जनाएको छ। ५०० लेयर्स वा ब्रोइलर, १०० लोकल कुखुरा, कालिज, टर्की वा २५० बट्टाई पालेका किसानलाई पनि पेन्सनका लागि योग्य मानिएको छ।
निरन्तर पाँच वर्षदेखि व्यावसायिक कृषिमा संलग्न किसान पेन्सनमा छनोट हुने नगर प्रमुख विशाल शर्माले बताए। यसका लागि चौरजहारीको स्थानीय बासिन्दा भने हुनुपर्नेछ।
प्रमुख शर्माले भने, ‘व्यावसायिक कृषिमा लागेका किसानलाई सधैँभरि पेन्सनको परिकल्पना गरेर कार्यक्रम अघि बढाइएको हो, पेन्सनबापतको रकम हरेक चौमासिकमा किसानको खातामा जम्मा हुनेछ।’
पेन्सनबापत दिइने रकम जम्मा हुनुअघि व्यवसाय निरन्तर गरे÷नगरेको अनुगमन गरेर मात्र सो पैसा खातामा जानेछ। व्यवसाय छाडेको खण्डमा भने पेन्सन रोक्का गरिनेछ।
रासस………………
