कर्णाली राजमार्गअन्तरर्गत नाग्म बजारमा पहिरो जाँदा तीन घर पुरिएका छन् । आइतबार आएको सुख्खा पहिरोले तीन वटा घर एकैसाथ पुरिँदा केही मानिसहरु पुरिएको आशंका गरिएको छ ।
जुम्ला र कालिकोटको सीमानामा पर्ने कालिकोटको तिलागुफा नगरपालिका – १ नाग्म बजारमा पहिरो खस्दा तीनवटा घरमा रहेका केही मानिसहरु पुरिएको आशंकाले खोजतलास भइरहेको घाइते तिलागुफा नगरपालिका १ का वर्ष १३ का अर्जुन हमालले बताए ।
घाइते हमालका अनुसार उनी आफन्त पर्ने ललित नेपालीको घरमा गएको र आइतबार पहिरो जाँदा तीन घर पुरिएका छन् ।
घाइते हमाललाई पहिरोबाट निकालेर उपचारका लागि कर्णाली स्वास्थ्य विज्ञान प्रतिष्ठानमा ल्याइएको जुम्लाका प्रहरी नायव उपरीक्षक लालबहादुर धामीले बताए ।
डिएसपी धामीले भने, ‘घाइतको भनाईलाई आधार मान्ने हो भने घरमा केही मानिस पुरिएको अवस्था छ । जुम्लाबाट प्रहरीको टोली पठाइसकेका छौ । जेसिवि लगाएर पहिरो पन्छाउने काम भईरहेको छ ।’
क्षतिको एकिन विवरण अहिले आइ नसकेकाले घटनाका बारेमा थप केही भन्न नसकिने उनले बताए ।
कोरोना भाईरस संक्रमण रोकथाम तथा नियन्त्रणका लागि जारी लकडाउन भएकाले घरमा विहान परिवारका सदस्यहरु घरभित्रै रहेकाले मानवीय क्षती भएको स्थानीयको भनाई उल्लेख गर्दै प्रहरीले जनाएको छ ।
सो क्षेत्रमा सञ्चारको कुनै पनि सेवा र सुविधाको पहुँच नभएका कारण जिल्ला प्रशासन कार्यालय कालिकोट र नजिकै पर्ने जुम्लामा समेत खबर नहुँदा घरभित्र पुरिएका मानिसलाई उद्धार गर्न ढिलाइ भएको स्थानीयको गुनासो छ ।
कर्णाली राजमार्गकै किनारका घरहरुमाथि पहिरो खसेकाले अहिले राजमार्ग पूर्ण रुपमा बन्द भएको छ ।
तत्काल उद्धार गर्न सके केहीलाई बचाउन सकिने स्थानीय मुनि बुढाले बताए ।
भिरालो जमिनमा रहेको बस्तीका घरहरूको सिरानमा पानीको भेल बगेपछि पहिरो गएको स्थानीयले बताएका छन् ।नयाँ पत्रिका दैनिकबाट साभार
